Käätzje
Käätzje wärme dir Hätz un Siel,
wenn se brenne janz stil.
Se wärme Dir Hängche un Jesech
un machen och noch Leech.
Janz uneigennötzig jitt se alles un flackert leicht em Wind,
ez ein dann zwei, drei un vier doh freut sich jedes Kind.
Un lurs Du nur dem Flämmche zoh, dann brenkgk et Dich janz sach,
jlöcklich un ruhig durch de Advend hin zur heiligen Naach.
November 2022 Bernd Kox
Kreise trecke
En et Wasser fällt ´ne Stein un trick doh schön `ne Kreis.
Och Du tricks manche Kreis, bei allem wat Du deihs.
Bei all dä jode Sache, brengs ov de Lück zom Laache,
och dat es ene Kreis, dat Laache Dinge Preis.
All ding jode Wöder sin och ene schöne Kreis,
se treffe en et Hätz ren, ich will dat Du dat weiß.
Ding jode Tate jeden Daach, die trecken ene Kreis,
Du hilfs de Minsche wigger un die sin Dinge Fleiß.
Du bes ´ne jode Käl, näh, Du bes keene Stein,
doch die Kreise die Du tricks, die kann jeder sin.
Du drächs de Tannebäum denne Lückcher bis für de Dür,
och dat es ene Kreis, stell Dir dat ens für.
Du kochs och immer Glühwein für ühre Weihnachtsmaaht
dann stoht ihr doh em Kreis un waat op de hellije Naach.
Doh lit eh kleen Jeschenk unger dem Baum für Dich,
suh schleß sich dann dä Kreis, Fruhe Weihnachte für Dich.
November 2022 B.Kox
De Krepp es leer
En unsrer Kirch, es en Krepp, janz vörre en d´r Medde,
en Frau, kneten vür ener Kätz un wor doh noch am bedde.
„Kutt flöck,“ rev se, „ich ben dut für Schreck,
de Krepp es janz leer, et Jesuskind es weg.“
Dä Pastur rev „ne, dat kann doch nit sin
dä Jupp un dat Marie ston doh janz allein.“
Och wot de Polizei en uns Kirch jerove,
se han ringseröm doh alles avjelofe.
Doch et wullt un wullt inne janit jelinge,
dat kleene Jesuskind zoh finge.
Ob Twitter un Whatsapp woht je chattet,
„Jesuskind, noch nicht jerettet.“
Dann wot et still un doh, janz höch,
kom ´ne kleene Fetz medden durch de Kirch.
Hä wor janz stolz un heelt dat Kind em Ärm,
met Schal un singer Jack, doh helt Hä Jesus wärm.
„Han en Rund Nintendo Switch met im jespillt,
hä kannt dat nit, ich han im alles verzählt.“
„Ich helt de Konsole, Super Mario, eh Autorenne.
Hä hatt de Hängche jefalde, dät bedde, ich sullt wohl jewinne.“
„Nohm vierte Renne es hä enjeschlofe, wor wohl jet möd.
Dröm breng ich en, en sing Krepp, en de Kirch zohröck.
Ich han jehoff, dat im Super Mario jefällt,
hä weiht joh och ens ene Retter der Welt.“
„Ich weiß, ihr hatt üch all öm dat Jesuskind Surje jemaaht,
evver ich han im noch nieh wirklich Danke jesaht.
Ich ben esuh jlöcklich un hä och, dat wor minge Grund.
Üch all fruhe Weihnachte un blievt bitte jesund.
November 2021 – B.Kox
Ob an Corona och jet Jodes es?
Wie mer ob einmol de Minche vermess.
Heilligovend fiere ich eh riesen Fest,
dat de Welt erstaune löss.
Einschränkunge weiht et doh keen jevve,
dat weiht schön, Du weiß et erlevve.
Ming janze Famillich bal Hundert Lück,
all ming Fründe un Kollege kommen och met.
Ming Lieblingskunde, dat sin secher vell
un och de treue Lieferante, dat weiht eh Spell.
Die Jecke, met denne ich Karneval mache,
mer singe Weihnachtsleder un dun vell lache.
Laschi un Lauti und dä Söder kütt och,
die Merkel un dä Spahn, ich krieje janit jenoch.
Ene riesige Weihnachtsbaum stellen ich en d´r Saal eren
un och en Kripp, met dem Jesuskind dren.
Maskenpflicht, bei mir ob keine Fall,
et weiht joh keene Maskenball.
Och Avstand bruch he keener zoh hale,
doht danze un üch ungerhale.
Am 24.Dezember es et eh suh wick,
ich hoffe nur Ihr hatt all Zick.
En welchem Saal wullt ihr wesse, dat mäht Sinn,
ich fiere met Üch all dev en mingem Hätze dren.
Dezember 2020 – B.Kox
Looft Kinder looft
Zint Määtes es hück widder he!
Looft, Kinder, looft.
Wenn dä uns rööf, sin mer he!
Looft, Kinder, looft!
De Lööch en de Hand
un dat Käätzje anjebrannt,
en de Strooß erob erav,
Looft, Kinder, looft!
Zint Määtes wor ne jode Man!
Looft, Kinder, looft.
Dä mer einfach jän muss han!
Looft, Kinder, looft.