Adventskranzsinge

Adventskranz om Desch, all neven de Mam.
Suh setzen mer un singe, et rüch noh Käätz un Tann.

Mer singen eh Weihnachtsleed, nur einer sing nit met,
dat es unsere Pap, weil hä dat Leedcher fleut.

De zweite Advent es Hück, mer freuen uns ald drop.
Et etzte Kääzche runder jesunge, dat Zweite hölt bal op.

Drei un Vier trecken noh, se brenne öm de Wett.
Adventssinge bei uns am Desch, dat wor immer suh nett.

De etzte Spekulatius steiht sick Nickolaus om Desch
un et Barbara braht Marzipankartöffelche, extra nur für mich.

Dominostein sin schnell keen mieh, op dem Teller drop,
beim Singe woht jemümmelt, et schmeckten joh suh jot.

Jän denk ich an d´r Advent met uns un Mam un Pap,
wie schön, wer sare kann, dat hä suh en Adventszick hat.

November 2022 B.Kox

De Chor steiht op d´r Bühn, medden om Weihnachtsmaat,
singen Weihnachtsleeder, vum Leiter schön parat jemaht.

Se wibbele hin un her, sin janz opjerech,
keen Wunder, de Mechte singen joh nur en de Kirch.

Dä Pitter fällt am meechte op,hä kennt de Note nitt.
Dat es nit schlemm, dat kennt mer joh de Andere trecken en met.

Et Kätt dat hätt sich fein jemaaht, wer hätt dat jedach,
et es doch etz de 1.Advent un nitt de de hellije Naach.

Beim vierte Leed et es bestuß, kommen nur noch schiefe Tön eruß.
Nohm drette Jlühwein an d´r Bud singe „Veedel“ uss einem Guss.

Ach du schön Adventszick, ach du joden Chor,
manche Leed han ich bis hellig Ovend noch im Uhr.

Nächstes Johr stoht ihr dann widder he bovven op d´r Bühn
un ich, ich trecke mich wärm an un kumme widder hin.

November 2022 B.Kox

Käätzje

Käätzje wärme dir Hätz un Siel,
wenn se brenne janz stil.
Se wärme Dir Hängche un Jesech
un machen och noch Leech.
Janz uneigennötzig jitt se alles un flackert leicht em Wind,
ez ein dann zwei, drei un vier doh freut sich jedes Kind.
Un lurs Du nur dem Flämmche zoh, dann brenkgk et Dich janz sach,
jlöcklich un ruhig durch de Advend hin zur heiligen Naach.

November 2022 Bernd Kox

Kreise trecke

En et Wasser fällt ´ne Stein un trick doh schön `ne Kreis.
Och Du tricks manche Kreis, bei allem wat Du deihs.

Bei all dä jode Sache, brengs ov de Lück zom Laache,
och dat es ene Kreis, dat Laache Dinge Preis.

All ding jode Wöder sin och ene schöne Kreis,
se treffe en et Hätz ren, ich will dat Du dat weiß.

Ding  jode Tate jeden Daach, die trecken ene Kreis,
Du hilfs de Minsche wigger un die sin Dinge Fleiß.

Du bes ´ne jode Käl, näh, Du bes keene Stein,
doch die Kreise die Du tricks, die kann jeder sin.

Du drächs de Tannebäum denne Lückcher bis für de Dür,
och dat es ene Kreis, stell Dir dat ens für.

Du kochs och immer Glühwein für ühre Weihnachtsmaaht
dann stoht ihr doh em Kreis un waat op de hellije Naach.

Doh lit eh kleen Jeschenk unger dem Baum für Dich,
suh schleß sich dann dä Kreis, Fruhe Weihnachte für Dich.

November 2022 B.Kox